ယူရို ၂၀၂၄ အပြီးမှာ ဂျရတ် ဆောက်ဂိတ် ဟာ အင်္ဂလန် နည်းပြ အဖြစ် ကနေ ထွက်ခွာပြီး မန်ချက်စတာ ယူနိုက်တက် အသင်းရဲ့ နည်းပြသစ် ဖြစ်လာနိုင်တယ်ဆိုတဲ့ သတင်းတခုဟာ မနေ့ကစတင်ပြီး ထွက်ပေါ် လာခဲ့ ပါတယ် ။ မန်ယူအသင်းရဲ့ ပူးတွဲ ပိုင်ရှင်သစ် ဖြစ်လာတဲ့ ဆာ ဂျင် ရတ်ကလစ် ဟာ ဆောက်ဂိတ် ကို နှစ်သက် သဘောကျပြီး အဲရစ် တန်ဟတ် ကို ထုတ်ပယ်ဖြစ်ခဲ့ပါက အစားထိုးသွားမယ့် နည်းပြ စာရင်းထဲမှာ ထည့်သွင်း ထားတယ်လို့ သတင်းထွက်လာခဲ့တာပဲ ဖြစ်ပါတယ် ။
အဲ့ဒီနောက်မှာတော့ မန်ယူနိုက်တက် ဂန္ထဝင် အသင်းခေါင်းဆောင်ဟောင်း ၂ ယောက် ဖြစ်ကြတဲ့ ဂယ်ရီ နဗီးလ် နဲ့ ရွိုင်ကင်း တို့ဟာ ဆောက်ဂိတ် ကို မန်ယူနိုက်တက် နည်းပြသစ် ဖြစ်လာနိုင်ချေ မြင့်မားကြောင်း ထောက်ခံ ပြောဆိုသွားခဲ့ကြပါတယ် ။
“တကယ်လို့သာ အင်္ဂလန် အသင်း ယူရိုမှာ အခြေအနေကောင်းခဲ့မယ် ၊ ဗိုလ်စွဲခဲ့မယ် ဆိုရင်ပေါ့ . . . သူ ( ဆောက်ဂိတ် ) ဒီအသင်းနဲ့ ခရီးဆက်ဦးမယ်လို့ အတော်များများက ထင်ထားကြပါတယ် ။ ဒါပေမယ့် မအောင်မြင် ခဲ့ရင်တော့ ကျိန်းသေပေါက် နှုတ်ဆက်မှာပါ ။ ယူနိုက်တက် ကို ရောက်လာမယ်လို့ နာမည်ကြီးနေတဲ့ ဒန် အက်စ်ဝေါ့သ် ( အားကစား ဒါရိုက်တာ အဖြစ် ) နဲ့ ဆောက်ဂိတ် တို့က အတော်လေး ကောင်းမွန်တဲ့ ဆက်ဆံရေးတွေ ရှိခဲ့ကြတာပါ ။ ဒါကြောင့် ဆောက်ဂိတ် သာ နည်းပြ ဖြစ်လာမယ်ဆိုရင် ကျွန်တော်တော့ အံ့သြမိမှာ မဟုတ်ပါဘူး” လို့ ရွိုင်ကင်းက ပြောဆိုခဲ့ပါတယ် ။
ဂယ်ရီ နဗီးလ် ကလည်း “ဂျရတ် ဆောက်ဂိတ် ကို မန်ယူနိုက်တက် နည်းပြ ဖြစ်လာလိမ့်မယ်လို့ တခါမှ စိတ်ကူးနဲ့တောင် မတွေးကြည့်ဖူးပါဘူး ။ ဒါပေမယ့် အခု ဒန် အက်စ်ဝေါ့သ် က ရောက်လာတော့မှာပါ ။ အဲရစ် တန်ဟတ် အနေနဲ့ သူ့ရဲ့ နေရာကို မြဲဖို့ ဘာလုပ်ဖို့ လိုမယ်ထင်လဲ ၊ FA Cup လောက်နဲ့တော့ ရမှာ မဟုတ်ပါဘူး ၊ ချန်ပီယံလိဂ် ဝင်ခွင့်ကို ယူနိုင်မှ ဖြစ်မှာပါ” လို့ အဲရစ် တန်ဟတ် ရဲ့ အနာဂါတ် နဲ့ မန်ယူနည်းပြသစ် ဖြစ်လာနိုင်ချေ အပေါ် သုံးသပ်ပြောဆိုသွားခဲ့ ပါတယ် ။
ဆောက်ဂိတ် ဟာ ၂၀၁၆ ခုနှစ်မှာ အင်္ဂလန် လက်ရွေးစင် အသင်းကြီးရဲ့ နည်းပြ ဖြစ်လာခဲ့ပြီး ၂၀၁၈ ကမ္ဘာ့ဖလား မှာ စတုတ္ထ ၊ ယူရို ၂၀၂၀ မှာ ဒုတိယဆုတွေကို အင်္ဂလန် အသင်းနဲ့ ရယူပေးထားနိုင်ခဲ့သူ ဖြစ်ပါတယ် ။ ဆောက်ဂိတ် လက်ထက် မှာ အင်္ဂလန် အသင်းဟာ စာရွက်ပေါ်မှာ ရေပန်းစားနေတဲ့ အဆင့်ထက် ပိုမို သာလွန်တဲ့ အသင်းတသင်း ဖြစ်လာခဲ့ပြီး အခုလာမယ့် ယူရို ၂၀၂၄ မှာလည်း ဗိုလ်စွဲမယ့် အသင်းတသင်းအဖြစ် အလေးပေးခံ ထားရပါတယ် ။
