တော့တင်ဟမ် ဟော့စပါး အသင်းရဲ့ နည်းပြ အန်တိုနီယို ကွန်တီ ဟာ မနေ့ညက ကစားခဲ့တဲ့ လန်ဒန် ဒါဘီ ပွဲစဉ်က အနီကတ် ဖြစ်ရပ် အတွက် အလွန် စိတ်ပျက် ခဲ့ပြီး အင်္ဂလန်ဒိုင်တွေ ဟာ သင်တန်းကျောင်းကို ပြန်သွားသင့်တယ်လို့ ပြောဆို ဝေဖန်သွားခဲ့ ပါတယ် ။
စပါး ဟာ အာဆင်နယ် ကို အီးမရိတ် မှာ သွားရောက် ယှဉ်ပြိုင် ခဲ့ပြီး ၃-၁ နဲ့ ရှုံးခဲ့တာကြောင့် အခု ရာသီရဲ့ ပထမဆုံး ရှုံးပွဲ အရသာကို မြည်းစမ်း သွားခဲ့ရပြီ ဖြစ်ပါတယ် ။
ပထမပိုင်းမှာ ၁ ဂိုးစီ သရေ ကျနေခဲ့တဲ့ ဒီပွဲဟာ လန်ဒန် ဒါဘီ ပီပီ အကျိတ်အနယ် နဲ့ ကြည့်လို့ ကောင်းခဲ့ ပါတယ် ။
အာဆင်နယ် က ၂-၁ နဲ့ အနိုင်ရနေတဲ့ အချိန်မှာ စပါး ရဲ့ ဘရာဇီး နောက်ခံလူ အီမာဆင် ရိုင်ရယ် ဟာ တနိုင်ငံတည်းသာ ဖြစ်တဲ့ အာဆင်နယ် တောင်ပံ ကစားသမား မာတင်နယ်လီ ရဲ့ ခြေထောက်ကို နောက်ကနေ နင်းမိခဲ့ ပါတယ် ။
ဒီဖြစ်ရပ် ကို ကွင်းလယ်ဒိုင် အန်တိုနီ တိုင်လာ က ပြင်းထန်တဲ့ ပြစ်ဒဏ်လို့ သတ်မှတ်ပြီး တိုက်ရိုက် အနီကတ် နဲ့ ထုတ်ပယ်ခဲ့ ပါတယ် ။
ဒီဆုံးဖြတ်ချက် ဟာ စပါး နည်းပြ ကွန်တီ အပါအဝင် စပါး နဲ့ သက်ဆိုင်သူ အားလုံးကို စိတ်ပျက်စေခဲ့ ပါတယ် ။
နောက်ပိုင်းမှာတော့ ဂရန်းနစ် ရှာကာ က အာဆင်နယ် အတွက် တတိယမြောက်ဂိုးကို သွင်းပြီး စပါးကို ပြန်လမ်းမဲ့ စေခဲ့ပါတယ် ။
“အင်္ဂလန်မှာ လုပ်ရကိုင်ရတာတွေက ခက်ခဲပါတယ် ။ ဘာလို့လည်း ဆိုတော့ ဒီမှာ သာတူညီမျှမှု ဆိုတာ သိပ်မရှိလို့ ပါပဲ” လို့ စပါး နည်းပြ ကွန်တီ က ပွဲအပြီး သတင်းစာရှင်းလင်းပွဲမှာ ပြောဆိုသွားခဲ့ ပါတယ် ။
ကွန်တီ က အီတလီ က ဒိုင်တွေရဲ့ လုပ်ရပ်တွေကို အင်္ဂလန် မှာလည်း အတုယူ ကျင့်သုံးသင့်တယ်လို့ ပြောဆိုခဲ့ပြီး အနီကတ် ဟာ သူတို့ကို များစွာ ခက်ခဲ သွားစေခဲ့ကြောင်း ပြောဆိုခဲ့ ပါတယ် ။
“အနီကတ် မဖြစ်သင့်တာတွေ အနီကတ် ဖြစ်လာတယ် ၊ အနီ ဖြစ်သင့်တာတွေက မဖြစ်လာဘူး ၊ အဝါလောက် ပဲ ပြလို့ရတာတွေက ထုတ်ပယ်ခံရမှုတွေ ဖြစ်လာပါတယ် ။ ဒီကိစ္စ နဲ့ ပတ်သက်ပြီး သူတို့ အဖြေရှာသင့် ပါပြီ ။
အီတလီ မှာ ဆိုရင် ကျွန်တော်တို့ ဒိုင်တွေက ကြာသပတေးနေ့တိုင်း တွေ့ကြ ၊ ဗီဒီယိုတွေ ပြန်ကြည့်ကြ ၊ ဆွေးနွေးကြ ၊ ပြန်သုံးသပ်တာတွေ လုပ်ကြပါတယ် ။ ဒါက အားလုံးကို ပိုကောင်း ပိုတိုးတက် လာစေတာပါ”
“အင်္ဂလန်မှာရော ဒါမျိုးတွေ လုပ်သလားဆိုတာ ကျွန်တော် မသိပါဘူး ။ ဒါပေမယ့် ဒါက တကယ် ကောင်းတဲ့ စိတ်ကူးပါပဲ ။
ကျွန်တော်တို့ က အမြင့်ဆုံး ပုံစံ ၊ အကောင်းဆုံး ရလဒ်တွေကို မျှော်ကိုးပြီး ယှဉ်ပြိုင် နေကြတာပါ ။ အကောင်းဆုံး ဘောလုံးသမားတွေ က အကောင်းဆုံး ဆုံးဖြတ်မှုတွေနဲ့ပဲ ထိုက်တန်ပါတယ် ။ VAR ကလည်း အမြင့်ဆုံး အဆင့်မှာ ရှိနေသင့်တာပါ”
“အနီကတ် ထိပြီးသွားတဲ့ နောက်မှာ သူတို့ တတိယ ဂိုး ရသွားခဲ့ ပါတယ် ။ ဒါက အရမ်းကို ပြန်လာနိုင်ဖို့ ခက်ခဲ သွားစေခဲ့တာပါ ။ အနီကတ် ထိလိုက်ချိန်မှာ ဘာဆက်လုပ်ရမယ် ဆိုတာကို ၄-၅ မိနစ်လောက် စဉ်းစား လိုက်ရပါတယ် ။ ဒီလိုပွဲမျိုး ၊ ဒီလို တိုက်စစ်ပြင်းပြင်း ကစားတဲ့ ပြိုင်ဘက်နဲ့ ကစားနေရတုန်းမှာ ၄-၅ မိနစ်လောက် မပြင်ဆင်နိုင် ရတာက တကယ့်ကို ခက်ခဲတဲ့ ကိစ္စပါပဲ”
“ကျွန်တော့ဘက်က ဆင်ခြေပေးရမယ် ဆိုရင်တော့ ပထမပိုင်းမှာ ကျွန်တော်တို့ ပွဲကို အသာစီး ရမယ့် အခွင့်အရေး အချို့ ရှိခဲ့ ပါတယ် ။ ဒါပေမယ့် အဆုံးသတ် ပေးပို့မှုတွေ လွဲနေခဲ့သလို ပြိုင်ဘက် ကိုလည်း နေရာလွတ်တွေ အများကြီး ပေးမိခဲ့ ပါတယ် ။ ဆုံးဖြတ်ချက် ( ဒိုင်တွေရဲ့ ) ကလည်း ဘက်မညီပါဘူး ။ ဒါတွေက ပွဲကို ဟန်ချက်မဲ့ စေခဲ့တာပါ ။ အနီကတ် က ပွဲကို သတ်လိုက်တာပါပဲ” လို့ ကွန်တီ က ပြောဆို သွားခဲ့ ပါတယ် ။
ဒီနိုင်ပွဲကြောင့် အာဆင်နယ် ဟာ အဆင့် ၁ နေရာမှာ ဆက်လက် ရပ်တည်နေပြီး နည်းပြ အာတီတာ နဲ့ အသင်းသားတွေ အတွက် ကြီးမားတဲ့ စိတ်ဓါတ် ခွန်အား ကို ဖြစ်စေခဲ့ပါတယ် ။
စပါး ကတော့ အဆင့် ၃ မှာ ဆက်လက် ရှိနေပြီး အာဆင်နယ် နဲ့ ၄ မှတ် ကွာဟ သွားခဲ့ရပါတယ် ။
လာမယ့် ရက်သတ္တပတ်မှာတော့ သူတို့ဟာ ပုံစံကောင်း ပြနေတဲ့ ဘရိုက်တန် ကို အဝေးကွင်းမှာ သွားရောက် ရင်ဆိုင် ရမှာ ဖြစ်ပြီး အဆိုပါ ပွဲမတိုင်ခင် ကြားရက်မှာတော့ ချန်ပီယံလိဂ် အုပ်စုပွဲအဖြစ် ဖရန့်ဖတ် အသင်းကို ဂျာမန်မြေပေါ်မှာ သွားရောက် ကစားရမှာပဲ ဖြစ်ပါတယ် ။
