ဒိန်းမတ် အသင်း နဲ့ ကစားရမယ့် ယူရို ၂၀၂၄ အုပ်စု ဒုတိယပွဲမှာ အင်္ဂလန် အသင်း နည်းပြ ဆောက်ဂိတ် အနေနဲ့ ဖိုဒန် ကို ချန်လှပ်ပြီး ဂေါ်ဒွန် ကို ပွဲထွက် အသုံးပြု သင့်တယ်လို့ ဂန်းနား တောင်ပံ ကစားသမားဟောင်း ဝဲလ်ကော့ က ပြောကြား လိုက်ပါတယ် ။
မန်ချက်စတာစီးတီး အသင်း တောင်ပံ ကစားသမား ဖိုဒန် ဟာ ဆားဘီးယားအသင်း နဲ့ ပွဲမှာ ပွဲထွက် ကစားခဲ့ပေမယ့် အသင်း အပေါ် အကျိုးမပြုနိုင်ခဲ့ဘဲ ခြေစွမ်းပြဖို့ ရုန်းကန် ခဲ့ရပါတယ် ။ ဒါကြောင့် အလန်ရှီးယား က ဒိန်းမတ် နဲ့ ပွဲမှာ ဖိုဒန် ထက်စာရင် ဂေါ်ဒွန် ၊ အက်ဇေး တို့ကို ပွဲထွက် လူစာရင်းမှာ ထည့်သွင်း အသုံးပြုဖို့ တိုက်တွန်း ပြောကြား သွားခဲ့ပါတယ် ။
ဝဲလ်ကော့ ကလည်း အလန်ရှီးယား ရဲ့ အကြံပြုမှုကို ထောက်ခံ သွားခဲ့ပြီး သူ့ရဲ့ အဲဗာတန် အသင်းဖော်ဟောင်း ဂေါ်ဒွန် ဟာ အသင်းအပေါ် ကောင်းကောင်း အကျိုးပြုနိုင်မယ့်သူ ဖြစ်တယ်လို့ ထောက်ခံ သွားခဲ့ပါတယ်။ ” ကျနော်ကတော့ အန်တိုနီ ဂေါ်ဒွန် ကို ကြိုက်ပါတယ်။ ကျနော်သူ့ကို အထင်လည်း ကြီးပါတယ် ။ ”
” သူ အပြင်ထွက်ကစားတာမျိူးကို ကျနော် သဘောကျပါတယ် ၊ ပြိုင်ဘက် နောက်ခံလူတွေကို စိန်ခေါ် ကစားရဲသူပါ ၊ သူ ဘာလုပ်မလဲဆိုတာ ပြိုင်ဘက် က ခန့်မှန်း ရသူမျိုးပေါ့ ၊ အင်္ဂလန် အသင်း အနေနဲ့ မတူ ကွဲပြားတဲ့ ပုံစံ တခု လိုအပ်တယ်လို့ မြင်ပါတယ် ၊ ဒါကြောင့်လည်း သူ့ကို ခေါ်လာတာ ဖြစ်နိုင်ပါတယ် ၊ သူက အသင်းကို ခြားနားတဲ့ ကစားဟန် တစ်ခုကို ပေးနိုင်စွမ်း ရှိပါတယ်။ ”
” အပြောင်းအလဲ လုပ်မယ်ဆို ကျနော်ကတော့ သူ့ကို ထည့်ချင်ပါတယ် ။ လက်ရှိ အချိန်မှာ ဖိုဒန် နဲ့ ပတ်သက်ပြီး ဆွေးနွေး ငြင်းခုန်မှုတွေ များနေပါတယ် ၊ သူ့နေရာမှာ ဘယ်သူ့ကို ကစားခိုင်းတာ အကောင်းဆုံး ဖြစ်မလဲပေါ့။ ဘယ်လင်ဂမ် က တကယ့်ကို ထူးချွန် ပြောင်မြောက်တဲ့ ကစားသမားပါ ၊ဖိုဒန် ရဲ့ အရည်အသွေး ကို မရတဲ့ အခါမျိုးမှာ ဂေါ်ဒွန် ကို ထည့်ကစားတာ အကောင်းဆုံးပါပဲ။ ”
” သူက စိတ်လှုပ်ရှားစရာ ကောင်းတဲ့ ကစားသမားပါ ။ တက်ကြွမှု အပြည့် ရှိသလို အကြောက်အလန့်လည်း မရှိပါဘူး ၊ နိုင်ငံတကာ အဆင့် မှာ သူ့လို ကစားသမားမျိုး လိုအပ်ပါတယ် ။ ” လို့ ပြောကြား သွားခဲ့ပါတယ် ။
