ရှက်တာဒိုးနက်အသင်း၏ ဥက္ကဋ္ဌဖြစ်သူ ရီနတ်အက်ခ်မီတော့ဗ်က အသင်း၏ တောင်ပံကစားသမား မူဒရစ်ကို ရောင်းချခဲ့သည့် ပြောင်းရွှေ့ကြေးငွေထဲမှ ပေါင် (၂၂)သန်းကို ရုရှားနိုင်ငံနှင့် စစ်ပွဲဖြစ်ပွားနေသည့် ယူကရိန်းနိုင်ငံအတွက် လှူဒါန်းသွားမည်ဖြစ်ကြောင်း ထုတ်ပြန်ကြေညာခဲ့သည်။
ချယ်လ်ဆီးအသင်းသည် မူဒရစ်အား (၈)နှစ်ခွဲစာချုပ်၊ ပေါင် (၈၉) သန်းဖြင့် ခေါ်ယူခဲ့ခြင်းဖြစ်ပြီး ယူကရိန်းကစားသမားများထဲတွင် စံချိန်တင်ပြောင်းရွှေ့ကြေးရှင်ကစားသမားလည်းဖြစ်လာခဲ့သည်။ အက်ခ်မီတော့ဗ်က ယခုလှူဒါန်းမှုသည် ကျဆုံးသွားသည့် ယူကရိန်းစစ်သားများ၏ မိသားစုဝင်များကို ကူညီသည့် ပရောဂျက်အတွက် ရည်ရွယ်ထားခြင်းဖြစ်ကြောင်းလည်း ပြောကြားခဲ့သည်။
အက်ခ်မီတော့ဗ်က “တိုင်းပြည် အတွက် အသက်ပေးကာကွယ်ပေးနေကြတဲ့ ယူကရိန်းစစ်သားတွေကို ကျွန်တော် အရမ်းကျေးဇူးတင်ပါတယ်။ ဒီနေ့ကတော့ ယူကရိန်းဘောလုံးလောကဟာ ယူကရိန်းတပ်မတော်ကို ဘယ်လောက်အထိ ကျေးဇူးတင်သလဲဆိုတာကို ပြသနိုင်ခဲ့တဲ့နေ့ပါပဲ။ မူဒရစ်ကို ရောင်းချရတဲ့အတွက် ကျွန်တော်တို့ ဝမ်းနည်းဝမ်းသာဖြစ်ရပေမဲ့ ဒီပြောင်းရွှေ့ကြေးငွေထဲက ပြန်လည်လှူဒါန်းခွင့်ရခဲ့တာကတော့ ကျေနပ်စရာပါ”ဟု ဆိုခဲ့သည်။
