မန်စီးတီးအသင်းသည် ၁၉၆၆ ခုနှစ်က အဲဗာတန်အသင်းနောက်ပိုင်း FA ဖလားဗိုလ်လုပွဲသို့ ပေးဂိုးမရှိ Clean Sheet ရလဒ်များဖြင့် တက်ရောက်နိုင်သည့် ပထမဆုံးအသင်းအဖြစ် မှတ်တမ်းဝင်ခဲ့ကြောင်း သိရသည်။
မန်စီးတီးအသင်းသည် ယခုရာသီ FA ဖလားပြိုင်ပွဲတွင် တတိယအဆင့်မှ စတင်ယှဉ်ပြိုင်ခဲ့ရပြီး ချယ်လ်ဆီးကို (၄-၀)ဂိုး၊ စတုတ္ထအဆင့်တွင် အာဆင်နယ်ကို (၁-၀) ဂိုး၊ ပဥ္စမအဆင့်တွင် ဘရစ္စတိုးလ်စီးတီးကို (၃-၀)ဂိုး၊ ကွာတားဖိုင်နယ်တွင် ဘန်လေကို (၆-၀)ဂိုး၊ ဆီမီးဖိုင်နယ်တွင် ရှက်ဖီးယူနိုက်တက်ကို (၃-၀)ဂိုးဖြင့် အနိုင်ရရှိကာ ပြိုင်ပွဲတစ်လျှောက် ပေးဂိုးမရှိ Clean Sheet ရလဒ်များ ရယူနိုင်ခဲ့ခြင်းဖြစ်သည်။
FA ဖလားပြိုင်ပွဲ၏ သမိုင်းတစ်လျှောက်တွင် ယင်းကဲ့သို့ စွမ်းဆောင်နိုင်သည်မှာ မန်စီးတီးအသင်းမတိုင်မီက အဲဗာတန်အသင်းသာ ရှိခဲ့ဖူးပြီး ၁၉၆၅-၆၆ ရာသီတွင် ချန်ပီယံဆုရရှိစဉ်က မန်စီးတီးနည်းတူ စွမ်းဆောင်နိုင်ခဲ့ခြင်းဖြစ်ကြောင်း သိရသည်။
အဲဗာတန်အသင်းသည် အဆိုပါ ၁၉၆၅-၆၆ ရာသီတွင် တတိယအဆင့်၌ ဆန်းဒါးလန်းအသင်းကို (၃-၀)ဂိုး၊ စတုတ္ထအဆင့်၌ ဘက်ဖို့ဒ်ကို (၃-၀)ဂိုး၊ ပဥ္စမအဆင့်၌ ကိုဗင်ထရီကို (၃-၀)ဂိုးဖြင့် အနိုင်ရရှိခဲ့ပြီး ကွာတားဖိုင်နယ်အဆင့်၌ မန်စီးတီးအသင်းနှင့် ပြန်ကန်ပွဲနှစ်ပွဲအပါအဝင် (၃)ပွဲကစားခဲ့ရာတွင် (၀-၀)၊ (၀-၀)၊ (၂-၀)ရလဒ် များရရှိခဲ့သည်။
ထို့နောက် ဆီမီးဖိုင်နယ်၌ မန်ယူအသင်းကို (၂-၀)ဂိုးဖြင့် အနိုင်ယူကာ ပွဲတိုင်း Clean Sheet ရလဒ်များဖြင့် ဗိုလ်လုပွဲသို့ တက်လှမ်းနိုင်ခဲ့ခြင်းဖြစ်သည်။
ဗိုလ်လုပွဲတွင်မူ ရှက်ဖီးဝင်းစ်ဒေးအသင်းကို (၃-၂)ဂိုးဖြင့် အနိုင်ရရှိခဲ့သည့်အတွက် မန်စီးတီးအသင်းအနေဖြင့် လာမည့်ဗိုလ်လုပွဲတွင် Clean Sheet ရလဒ်ဖြင့် ထပ်မံအနိုင်ရခဲ့ပါက ပြိုင်ပွဲတစ်လျှောက် Clean Sheet ရလဒ်ဖြင့် ချန်ပီယံဆုရယူနိုင်သည့် တစ်သင်းတည်းသောအသင်းအဖြစ် စံချိန်သစ်စိုက်ထူနိုင်မည်ဖြစ်သည်။
