ဒီရာသီ အာဆင်နယ် အသင်းမှာ စွမ်းဆောင်ရည်ကောင်းတွေ ပြသ ထားနိုင်တဲ့ မာတင်နယ်လီ ဟာ ၂၀၂၂ ကာတာ ကမ္ဘာ့ဖလား ပြိုင်ပွဲဝင် ဘရာဇီး လက်ရွေးစင် အသင်းမှာ အသင်းဖော် ဂျေးဇု နဲ့ အတူ ရွေးချယ် ခံခဲ့ရပါတယ် ။
မာတင်နယ်လီ ရွေးချယ်ခံရမှု အပေါ် အများစု က လက်ခံကြပေမယ့် ဘရာဇီး ကွင်းလယ်လူဟောင်း နက်တို ကတော့ ခုလို အပြင်းအထန် ဝေဖန် ခဲ့ပါတယ် ။” မာတင်နယ်လီ ကို ရွေးလိုက်တာ ဘာကြောင့်လဲ ပြောစမ်းပါဦး ၊ အခုမှ ကစားသမား ဘဝ သွင်းဂိုး ၃၃ ဂိုးပဲ ရှိသေးတဲ့သူလေဗျာ ၊ တကယ့်ကို ယုတ်ပဲ့လွန်းပါတယ် ။ ဒါက ဘောလုံး လောက ကို မလေးမစား လုပ်လိုက်တာပါပဲ ၊ ဘောလုံးလောက က ဘယ်လောက် အထိ ညစ်ပတ် စုတ်ပြတ်နေပြီလဲ ဆိုတာ ပြသလိုက်တာပါပဲ ။ ”
” မာတင်နယ်လီ ကိုကျ ခေါ်ပြီး ဘာဘိုဆာ ကိုကျ မခေါ်တာက လေးစားမှု ကင်းမဲ့တာပါပဲ ။ ရွေးချယ်ခံရသူတွေ အားလုံးထဲမှာ မာတင်နယ်လီ ကို ရွေးချယ်တာက နည်းပြ တီတီ ဘရာဇီး အသင်းမှာ ဆက်ရှိမနေသင့်တော့ဘူး ဆိုတာ ပြသလိုက်သလိုပါပဲ ။ မာတင်နယ်လီ က ခုမှ ဒီရာသီ ၅ ဂိုးပဲ သွင်းထားရသေးတာပါ ၊ ကာတာမှာလည်း မကန်ရပဲ mall ထဲပဲ လမ်းလျှောက်နေရမယ့် ကစားသမားပါ ၊ ဘယ်သူမှလည်း သူ့ကို သိကြမှာ မဟုတ်ပါဘူး ။ ”
” သူ မရွေးတဲ့ Gabigol ဆို တစ်ရာသီတည်း ၂၉ ဂိုး အထိ သွင်းပြီး Libertadores final မှာ အနိုင်ဂိုး သွင်းခဲ့သူပါ ။
မာတင်နယ်လီ က ဥရောပ မှာ ဘာလုပ်ပြထားပြီးပြီလဲ ၊အာဆင်နယ် က ချန်ပီယံလိဂ်တောင် မကန်ရတဲ့ အသင်းလေဗျာ ၊ တကယ့်ကို အကြီးအကျယ် အရှက်စရာ ရွေးချယ်မှုပါပဲ ။ “လို့ ဆိုးဆိုး ရွားရွား ဝေဖန် ခဲ့တာပါ ။
မာတင်နယ်လီ ကတော့ နက်တို ရဲ့ဝေဖန်မှု နဲ့ ပတ်သက်ပြီး ESPN Brasil နဲ့ အင်တာဗျူးမှာ ” ကျွန်တော်ကတော့ ပုံမှန် ဖြစ်နေကြ အရာလို့ပဲ ထင်ပါတယ် ။ဘရာဇီး က လူတစ်ချို့က ကျွန်တော့်ကို မသိကြပါဘူး ၊ တခြား ကစားသမား တစ်ဦးက လူစာရင်းမှာ ပါဝင်ဖို့ ပိုပြီး ထိုက်တန်တယ်လို့ ပြောတာကလည်း ပုံမှန်ပါပဲ ။ ”
” ကျွန်တော် ကတော့ ဘာမှ မဖြစ်ပါဘူး ၊ အေးဆေးပါပဲ ၊ ကျွန်တော် ကလပ် အသင်းအတွက် ဘာတွေ လုပ်ပြထားသလဲ ၊ ဘာတွေ လုပ်နိုင်သလဲ ကောင်းကောင်း ကိုယ့်ကိုယ်ကို သိပါတယ် ၊ ကိုယ့် အရည်အချင်းကိုလည်း ယုံကြည်ပြီးသားပါ ။ နောက်ပြီး သေချာပေါက် ပြောနိုင်တာ တစ်ခုက ဘရာဇီး လက်ရွေးစင် အသင်း အတွက် အကောင်းဆုံး ကြိုးစား ကစား သွားမယ်ဆိုတာပါပဲ ၊အသင်းကို ကျွန်တော် အစွမ်းကုန် ကူညီ ပေးသွားမှာပါ ၊ ကျွန်တော့်အတွက်လည်း အတွေ့အကြုံကောင်းတစ်ခု ဖြစ်ပါလိမ့်မယ် ။ ”
” ကျွန်တော်တို့ ကမ္ဘာ့ဖလား လူစာရင်းမှာ ရွေးချယ်ခံရတဲ့ အပေါ် အသင်းကလူအားလုံးက ပျော်နေကြပါတယ် ။ ကမ္ဘာ့ဖလား ကစားရတဲ့သူတွေ ရှိနေတာကလည်း အာဆင်နယ် အတွက် ကောင်းတဲ့ အရာပါ ၊ အသင်းက လူတိုင်း အရမ်းပျော်နေကြပါတယ် ၊ ကျွန်တော်တို့က စုစည်း ညီညွှတ်မှု ရှိတဲ့ အသင်း တစ်သင်းလေဗျာ ။ ”
” ဆာကာ ၊ ရမ်စ်ဒေးလ် ၊ ဘန်ဝှိုက်တို့ ရွေးချယ် ခံရတော့ တစ်ယောက် နဲ့ တစ်ယောက် ဂုဏ်ပြု စကားတွေ ပြောရင်း ပျော်နေကြတာပါ ။ ကျွန်တော်တို့ အသင်းက ပရီးမီးယားလိဂ် ထိပ်ဆုံးမှာ ရပ်တည် နေတဲ့ အသင်း ဆိုတာ သိပါတယ် ၊ ဒါပေမယ့် အခုမှ အစပဲ ရှိသေးတာကြောင့် ကျွန်တော်တို့ အများကြီး လုပ်ဆောင် ကြိုးစား ရပါဦးမယ် ။ ” လို့ ပြောကြား သွားခဲ့ပါတယ် ။
