ယူကရိန်း ကလပ် ရှက်တာ ဒိုးနက် ဟာ ယူရို သန်း 50 နစ်နာမှု အတွက် ကမ္ဘာ့ဘောလုံး အဖွဲ့ချုပ် ဖီဖာ ကို CAS တရားရုံးမှာ တရားစွဲဆို လိုက်ပြီ ဖြစ်ပါတယ်။ တရားစွဲဆိုရတဲ့ အချက်ဟာ FIFA က ယူကရိန်း မှာ ရှိတဲ့ နိုင်ငံခြားသား ကစားသမားတွေ အနေနဲ့ သူတို့ရဲ့ စာချုပ်တွေကို တစ်ဖက်သတ် ရပ်စဲခွင့်ရှိတယ် ဆိုတဲ့ ဆုံးဖြတ် ကြောင့်ဖြစ်ပြီး ၊ အဲဒီ လုပ်ရပ်ကြောင့် ကလပ်အသင်းအတွက် တန်ဖိုး ယူရို သန်း 50 ခန့် ဆုံးရှုံးလိုက်ရပါတယ်။
ယူကရိန်း ပြည်တွင်း ချန်ပီယံ 13 ကြိမ် ဖြစ်ထားတဲ့ ရှက်တာ ဒိုးနက်ဟာ ဒီလထဲမှာပဲ CAS တရားရုံး က တာဝန်ရှိသူ Mathieu Reeb ထံ စာရွက်စာတမ်းတွေ ကို တရားဝင် လွှဲပြောင်း ပေးအပ်လိုက်ပါတယ်။ ချန်ပီယံလိဂ် ပြိုင်ပွဲ ပုံမှန် ရရှိနေတဲ့ အသင်းမျိုး ဖြစ်တဲ့ အတွက် ၊ FIFA ရဲ့ ဆုံးဖြတ်ချက်ဟာ သူ့အပေါ် အရမ်းကို ထိခိုက်ခဲ့ရတဲ့ အကြောင်းအရင်းကို CAS ထံ တင်ပြတဲ့ စာရွက်စာတမ်းတွေ ထဲမှာ သေချာ ရှင်းပြထားပါတယ်။
ရုရှား က ယူကရိန်း ကို ကျူးကျော်စစ် ဆင်နွှဲပြီးနောက်ပိုင်း FIFA ဟာ ဇွန်လ 21 ရက်နေ့မှာပဲ ယူကရိန်း ကလပ်တွေ နဲ့ စာချုပ် ချုပ်ဆိုထားတဲ့ ကစားသမားတွေ ၊ နည်းပြတွေ အနေနဲ့ သူတို့ရဲ့ စာချုပ်တွေကို 2023 ခုနှစ် ဇွန်လ 30 ရက် အထိ ဆိုင်းငံ့ထားလို့ ရတယ်လို့ တရားဝင် ကြေငြာခဲ့သလို ၊ နှစ်ဖက် သဘောတူညီမှု ကလဲ ဒီနှစ် ဇွန် လ 30 ရက် မတိုင်ခင် အပြီးသတ် လုပ်ဆောင်ရမယ့် အကြောင်းပါ ပါရှိခဲ့ပါတယ်။
ရှက်တာ ဒိုးနက် အသင်းဟာ သူတို့ရဲ့ ကစားသမား စာရင်းမှာ နိုင်ငံခြားသား ဘောလုံးသမား စုစုပေါင်း 14 ယောက် အထိ ရှိပါတယ်။ သူတို့ အသင်း ဝင်ငွေ တွေကလဲ ရုရှား က ကျူးကျော်စစ် ဆင်နွှဲပြီးနောက်ပိုင်း ဆက်တိုက် ထိုးကျခဲ့တာပါ။
ဒါကြောင့် အသင်း ဘဏ္ဍာရေး ပြန်လည် တည့်မတ်နိုင်ဖို့ အတွက် စွမ်းဆောင်ရည်ကောင်းမွန်တဲ့ နိုင်ငံခြားသား ကစားသမားတွေကို ရောင်းထုတ်ဖို့ ဆန္ဒရှိနေသည့်တိုင်အောင် ၊ ဖီဖာ ရဲ့ ဆုံးဖြတ်ချက်ကြောင့် ရောင်းစရာ ကစားသမား မကျန်တော့ပဲ ဖြစ်သွားပါတယ်။
နိုင်ငံခြားသား အများစုဟာ စစ်ဖြစ်နေတဲ့ နိုင်ငံအတွင်းကို ပြန်လည် လာရောက် ကစားဖို့ ဆန္ဒမရှိကြတော့သလို ၊ ကလပ် အသင်းကလဲ သူတို့ကို ရောင်းထုတ်ပေးမယ့် အကြောင်း ကတိခံခဲ့သည့်တိုင်အောင် ဖီဖာ က သတ်မှတ်ထားတဲ့ ရက်က တိုတောင်းလွန်းတာကြောင့် ကမောက်ကမတွေ ဖြစ်ကုန်ကြပါတယ်။
ဖီဖာ ဟာ ဇွန်လ 30 ရက် မတိုင်ခင် အပြီး ဖြေရှင်းရမယ်လို့ ဖော်ပြမိတာကြောင့် ဘောလုံးသမားတွေ ရဲ့ အေးဂျင့်တွေဟာ ပြောင်းရွှေ့ကြေး မပေးရအောင် ဝေ့လည်ကြောင်ပတ်လုပ်ပြီး ၊ သူတို့ ကစားသမားတွေ ကို ဆွဲထုတ်သွားကြပါတယ်။ အဲဒီမှာပဲ ရှက်တာဒိုးနက်ဟာ နစ်နာမှုတွေ အများကြီး နဲ့ ကျန်ရစ်ခဲ့တော့တာပါ။
အသင်း ရဲ့ အလုပ်အမှုဆောင်ချုပ် Sergei Palkin ရဲ့ ပြောပြချက် အရ ခြေစွမ်းကောင်းတဲ့ နိုင်ငံခြားသား ဘောလုံးသမား 4 ယောက် ရဲ့ တန်ဖိုးတင် ယူရို သန်း 50 အထိ ရှိတယ်လို့ သိရပြီး ၊ အဲဒီ ငွေတွေကို ဖီဖာ က ပြန်လည် လျော်ကြေးပေးဖို့ CAS ကနေ တဆင့် တောင်းဆိုတာ ဖြစ်တယ်လို့ ရှင်းပြထားပါတယ်။
တရားဥပဒေ စိုးမိုးတဲ့ ဒေသတွေ ဆိုတော့ ကမ္ဘာ့ ဘောလုံး အဖွဲ့ချုပ် ရဲ့ ဆုံးဖြတ်ချက်ကိုတောင် ပြန်ပြီး တရားစွဲလို့ ရသလို ၊ မိမိနစ်နာ တဲ့ အတိုင်း ပြန်လည် ရရှိဖို့ အတွက်လဲ တောင်းဆိုခွင့် အပြည့်ရှိနေပါတယ်။
CAS ရဲ့ ဆုံးဖြတ်ချက် က ဘယ်လောက်အထိ မျှမျှတတ ရှုမြင်နိုင်မလဲ ဆိုတာ စောင့်ကြည့်သွားရမှာပါ။
