ဆော်ဒီကလပ် အယ်လ်နာဆာအသင်း၏ ပေါ်တူဂီတိုက်စစ်မှူး စီရော်နယ်လ်ဒိုသည် ယခုရာသီ ဆော်ဒီပရိုလိဂ်ပြိုင်ပွဲ၏ သြဂုတ်လအတွက် အကောင်းဆုံးကစားသမားဆုကို ရရှိခဲ့ကြောင်း သိရသည်။
၂၀၂၃-၂၄ ရာသီ ဆော်ဒီပရိုလိဂ်ပြိုင်ပွဲကို သြဂုတ်(၁၁)တွင် စတင်ကျင်းပခဲ့ပြီး သြဂုတ်လအတွင်း ပွဲစဉ်(၄)ပွဲ ယှဉ်ပြိုင်ခဲ့ကြသည်။
အယ်လ်နာဆာအသင်းသည် အဆိုပါပွဲစဉ်(၄)ပွဲ၌ (၂)ပွဲနိုင်၊ (၂)ပွဲရှုံးနိမ့်ခဲ့သော်လည်း စီရော်နယ်လ်ဒိုမှာမူ (၅)ဂိုးသွင်းယူကာ ဂိုးဖန်တီးမှု(၂)ကြိမ် ပြုလုပ်နိုင်ခဲ့သည်။
ထို့ကြောင့် စီရော်နယ်လ်ဒိုသည် ယခုရာသီ ဆော်ဒီပရိုလိဂ်ပြိုင်ပွဲတွင် ဂိုးသွင်းအများဆုံးကစားသမားအဖြစ် ဦးဆောင်နေသလို၊ ဂိုးဖန်တီးမှုအများဆုံးစာရင်းတွင်လည်း အခြားကစားသမား(၈)ဦးနှင့်အတူ ပူးတွဲဦးဆောင်လျက်ရှိသည်။
ထို့ကြောင့် သြဂုတ်လအတွက် အကောင်းဆုံးကစားသမားအဖြစ် ရွေးချယ်ခံရခြင်းဖြစ်ကြောင်း သိရသည်။
စီရော်နယ်လ်ဒိုသည် ဆော်ဒီပရိုလိဂ်ပြိုင်ပွဲသို့ ပြီးခဲ့သည့်ရာသီကတည်းက ရောက်ရှိခဲ့ခြင်းဖြစ်ပြီး ဖေဖော်ဝါရီလတွင် လအလိုက်အကောင်းဆုံးကစားသမားဆု တစ်ကြိမ်ရရှိခဲ့ဖူးသည်။
ယခုဆုမှာ ၎င်းအတွက် ဒုတိယအကြိမ်ဖြစ်ကြောင်း သိရသည်။
