အာဆင်နယ်တို့ ဆောက်သမ်တန် အသင်း နဲ့သရေကျပြီး အမှတ်ထပ်လျော့ ခဲ့ရတဲ့ ပွဲအပြီးမှာ ဂန်းနား ဂန္တဝင် လီးဒီဇွန် ဟာ ဇင်ချန်ကို ဟာ စွမ်းဆောင်ရည် အပေါ် ဝေဖန် ပြောကြား သွားခဲ့ပါတယ် ။ ဝက်စ်ဟမ်း အသင်း နဲ့ ပွဲကို ဒဏ်ရာကြောင့် လွဲချော် ခဲ့တဲ့ ဇင်ချန်ကို ဟာ ဒီမနက် ဆောက်သမ်တန် နဲ့ ပွဲ ပွဲထွက် လူစာရင်းမှာ ပြန်လည် ပါဝင် လာခဲ့ပါတယ် ။
အာဆင်နယ် နှင့် ဆောက်သမ်တန် ၃ ဂိုးစီ သရေကျတဲ့ပွဲအပြီးမှာ လီးဒီဇွန် က ” ပေးလိုက်ရတဲ့တတိယဂိုးမှာ ဇင်ချန်ကို ကို ကြည့်ကြည့် စမ်းပါဗျာ ။ သူ လူကပ် ကစားရမယ့် ကစားသမားလည်း ရှိတယ် ၊ သူကိုယ်တိုင်လည်း မျက်ခြေမပြတ် ကြည့်ပီး လိုက်ကပ် ထားရဲ့သားနဲ့ ဘောလုံးလည်း ကန်တင်လိုက်ရော သူက ဘယ်ချောင်မှာ သွားအိပ်နေသလဲ မသိပါဘူးဗျာ ။ ”
” သူက သိပ်တော် သိပ်ကောင်းတဲ့ နောက်ခံလူ တစ်ဦးတော့ မဟုတ်ပါဘူး ။ သူ ဘောလုံး ကိုင်ကစားတာ ကောင်းတာ လက်ခံပါတယ် ၊ အာဆင်နယ် က သူ့ရဲ့ အားသာချက် ကို အသုံးပြုပြီး ကစားနေရတာလည်း မှန်ပါတယ် ၊ ဒါပေမယ့် အသင်း ဘောလုံး မကိုင်ထားနိုင်ချိန်မှာ သူ ကစားတာ အဆင်မပြေပါဘူး ။ ”
” အန်ဖီးလ် မှာ လီဗာပူး နဲ့ ကစားခဲ့ရတဲ့ ပွဲတုန်းက တစ်ကြိမ် ဖြစ်ခဲ့ပြီးပါပြီ ၊ ခုနောက်ထပ် တစ်ကြိမ် ထပ်ဖြစ်ပြန်ပါပြီ ၊ သူ့အနေနဲ့ နောက်ခံလူ တစ်ဦးလိုမျိုး နိုးကြွ တက်ကြွနေဖို့ လိုပါတယ် ၊ ကွင်းလယ်ကို ဝင်ကစားသည် ဖြစ်စေ ဝင်မကစားသည် ဖြစ်စေပေါ့ဗျာ ၊ ကိုယ့်အသင်း ဂိုးပိုက်ထဲ ဘောလုံး မဝင်အောင် လုပ်ရမယ့် တာဝန် ကိုယ့်မှာ ရှိတယ်ဆိုတာ သိထားရပါမယ် ။ ” လို့ ပြောကြား သွားခဲ့ပါတယ် ။
