ဘာစီလိုနာအသင်းဟာ စာချုပ်သစ်မသေချာတဲ့ တော့တင်ဟမ်အသင်းခေါင်းဆောင် ဆွန်ဟောင်မင်ကို အလွတ်နဲ့ခေါ်ယူဖို့ မျက်စိကျနေတယ်လို့ သိရပါတယ်။ ဘာစီလိုနာဟာ ဘဏ္ဍာရေးအခက်အခဲကြောင့် အိုလ်မိုကို တရားဝင်မှတ်ပုံတင်နိုင်ခြင်းမရှိသေးတာဖြစ်ပါတယ်။ အဆိုပါအခြေအနေကြောင့် လူသစ်ခေါ်ယူဖို့ လိုအပ်နေပြီး ဆွန်ကို မျက်စိကျနေတာဖြစ်ပါတယ်။
EI Nacional သတင်းဌာနရဲ့အဆိုအရ တောင်ကိုရီးယားသားဟာ ဘာစီလိုနာရဲ့ပစ်မှတ်ထဲမှာရှိနေပြီး တော့တင်ဟမ်နဲ့စာချုပ်သက်တမ်းက နွေရာသီမှာ ကုန်ဆုံးမှာဖြစ်ပါတယ်။စာချုပ်အနေအထားကြောင့် ဆွန်အနေနဲ့ လာမယ့်ဈေးကွက်ထဲမှာ ပြည်ပကလပ်အသင်းနဲ့ အကြိုသဘောတူညီမှုရယူနိုင်တာဖြစ်ပါတယ်။ စာချုပ်ထဲမှာ ပါဝင်တဲ့ ၁ နှစ်သက်တမ်းတိုးခွင့်ကို တော့တင်ဟမ်ဘက်က အသုံးချဖို့ ပြင်ဆင်နေပေမယ့် စာချုပ်ထဲမှာတော့ လက်မှတ်မထိုးရသေးတာဖြစ်ပါတယ်။
ဆွန်ဟာ တော့တင်ဟမ်အတွက် ပွဲပေါင်း ၄၃၁ ပွဲအထိ ပါဝင်ကစားထားကာ ၁၆၉ ဂိုးသွင်း ၊ ၉၀ ဂိုးဖန်တီးထားနိုင်ပါတယ်။ ဘာစီလိုနာဘက်က ချန်ပီယံလိဂ်ပုံမှန်ဝင်ခွင့်ရတာကြောင့် ဆွန်ကို ဆွဲဆောင်နိုင်ချေရှိနေပြီး တော့တင်ဟမ်က လက်ရှိအဆင့် ၁၂ နေရာမှာ ရပ်တည်နေပါတယ်။
