အာဆင်နယ်အသင်းနည်းပြ အာတီတာက မိမိတို့အနေနဲ့ လီဗာပူးကို လိုက်မီချင်တယ်ဆိုရင် ပြီးပြည့်စုံရမယ်လို့ ပြောကြားလိုက်ပါတယ်။ အာဆင်နယ်ဟာ ပြီးခဲ့တဲ့ ၂ ရာသီအတွင်း စီးတီးကို ဖိအားပေးနိုင်ခဲ့တာဖြစ်ပြီး ၂ ရာသီဆက် ဒုတိယနေရာမှာသာ ရပ်တည်နိုင်ခဲ့ပါတယ်။
အခုရာသီမှာလည်း ဆက်လက်ဖိအားပေးနိုင်ဖို့ ထင်ခဲ့ကြပေမယ့် လီဗာပူးက မထင်မှတ်ပဲ ဦးဆောင်နေတာဖြစ်ပြီး စီးတီးလည်း ခြေချော်နေခဲ့တာဖြစ်ပါတယ်။
အာဆင်နယ်ဟာ အခုလာမယ့်စနေနေ့မှာ လန်ဒန်ဒါဘီပွဲအဖြစ် ဝက်စ်ဟမ်းနဲ့ရင်ဆိုင်ရမှာဖြစ်ကာ ပြီးခဲ့တဲ့ပွဲတွေမှာ အနိုင်ရလဒ်ရယူထားနိုင်ခဲ့ပါတယ်။
တကယ်လို့ အာဆင်နယ်အနေနဲ့ ဝက်စ်ဟမ်းကိုအနိုင်ရခဲ့ရင် စီးတီး နဲ့ လီဗာပူးတို့ပွဲမတိုင်ခင် အဆင့် ၂ နေရာကို တက်ရောက်ထားနိုင်မှာဖြစ်ပါတယ်။
“သူတို့ (လီဗာပူး)က ဒီစွမ်းဆောင်ရည်အတိုင်းဆက်သွားမှာ သေချာပါတယ်။ ဒီရာသီမှာ သူတို့အကောင်းဆုံးစွမ်းဆောင်ထားနိုင်ပါတယ်။ ဒါပေမယ့် ကျွန်တော်တို့လည်း ကိုယ့်ကိုကိုယ် အာရုံစိုက်ရပါမယ်။
တည်ငြိမ်အောင် ထိန်းသိမ်းရမှာဖြစ်ပြီး အထူးသဖြင့် စွမ်းဆောင်ရည်ပိုင်းကိုပါ။ အဲ့တာက ကျွန်တော်တို့ကို အနိုင်ရလဒ်တွေပေးစွမ်းနိုင်မှာပါ။ ခရီးအရှည်ကြီး သွားရဦးမှာပါ။
အနိုင်ရလဒ်တွေက ကျွန်တော်တို့ခွန်အားတွေအပြင် ယုံကြည်မှုကိုပါ ပေးစွမ်းနိုင်ပါတယ်။ ကျွန်တော်တို့ ၂ ပွဲပြန်နိုင်လိုက်တာက ကောင်းပါတယ်။ အခုတော့ တည်ငြိမ်မှုအကြောင်းပြောရမှာပါ။
အရှိန်အဟုန်ကို ဆက်ထိန်းပြီး အနိုင်ရလဒ်ဖော်ဆောင်ရပါမယ်။ ၃ ရက်တိုင်းမှာ ပွဲကန်နေရပေမယ့် မနေ့က ဘာလုပ်ခဲ့လဲဆိုတာက ပြဿနာမဟုတ်ပါဘူး။ နောက်ရက်တွေ နဲ့ နောက်ပိုင်းစွမ်းဆောင်ရည်တွေက အဓိကပါ။
ပြိုင်ပွဲတစ်လျှောက်တည်ငြိမ်မှုကို ဆက်ထိန်းနိုင်ဖို့ လိုအပ်သလို ပြိုင်ဘက်တိုင်းက ရင်ဆိုင်ရတာခက်ခဲလာပါပြီ။ ဒါကြောင့် ကျွန်တော်တို့ မနက်ဖြန်မှာ ကြိုးစားဖို့ လိုအပ်ပါတယ်။
ကစားသမားကောင်းတွေပြန်လည်ပါဝင်လာတာက အသင်းရဲ့ရလဒ်ပိုင်းကို တည်ငြိမ်စေပါတယ်။ အဲ့တာက ပွဲကိုမတူညီတဲ့အဆင့်အတန်းဆီခေါ်ဆောင်သွားပါတယ်။
မာတင်ပါဝင်လာတာက ကျွန်တော်တို့အတွက် ကြီးမားတဲ့သက်ရောက်မှုရှိစေပါတယ်”လို့ အာတီတာက ပြောကြားခဲ့ပါတယ်။
